اوزاعی نے کہا : میں نے یحیی سے سنا ، کہتے تھے : میں نے ابوسلمہ سے سوال کیا :’’ قرآن کا کون سا حصہ پہلے نازل ہوا ؟ کہا : «﴿يٰٓاَيُّهَا الْمُدَّثِّرُ﴾» ۔ میں نے کہا : یا «﴿اِقْرَاْ﴾» ؟ ابوسلمہ نے کہا : میں نے جابر بن عبداللہ رضی اللہ عنہما سے پوچھا : قرآن کا کون سا حصہ پہلے اتارا گیا ؟ انہوں نے جواب دیا : «﴿ يٰٓاَيُّهَا الْمُدَّثِّرُ ﴾» ۔ میں نے کہا : یا «﴿ اِقْرَاْ ﴾ ؟ » جابر رضی اللہ عنہ نے کہا : میں تمہیں وہی بات بتاتا ہوں جو ہمیں رسول اللہ ﷺ نے بتائی ۔ آپ ﷺ نے فرمایا :’’ میں نے حراء میں ایک ماہ اعتکاف کیا ۔ جب میں نے اپنا اعتکاف ختم کیا تو میں اترا ، پھر میں وادی کے درمیان پہنچا تو مجھے آواز دی گئی ، اس پر میں نے اپنے آگے پیچھے دائیں بائیں نظر دوڑائی تو مجھے کوئی نظر نہ آیا ، مجھے پھر آواز دی گئی تو میں نے دیکھا ، مجھے کوئی نظر نہ آیا ، پھر ( تیسری بار ) مجھے آواز دی گئی تو میں نے سر اوپر اٹھایا تو وہی ( فرشتہ ) فضا میں تخت ( کرسی ) پر بیٹھا ہوا تھا ( یعنی جبریل علیہ السلام ) اس کی وجہ سے مجھ پر سخت لرزہ طاری ہو گیا ۔ میں خدیجہ رضی اللہ عنہا کے پاس آ گیا اور کہا : مجھے کمبل اوڑھا دو ، مجھے کمبل اوڑھا دو ، انہوں نے مجھے کمبل اوڑھا دیا اور مجھ پر پانی ڈالا ۔ تو اس ( موقع ) پر اللہ تعالیٰ نے یہ آیات اتاریں :’’ اے کمبل اوڑھنے والے ! اٹھ اور ڈرا اور اپنے رب کی بڑائی بیان کر اور اپنے کپڑے پاک رکھ ۔‘‘ 

 علی بن مبارک نے بھی یحیی بن ابی کثیر سے اسی سند کے ساتھ روایت کی اور کہا :’’ تو وہ آسمان و زمین کے درمیان ایک کرسی پر بیٹھے ہوئے تھے ۔‘‘ 

 شیبان بن فروخ نے ہمیں حدیث سنائی ، کہا ہمیں حماد بن سلمہ نے حدیث سنائی ، کہا : ہمیں ثابت بنانی نے حضرت انس بن مالک رضی اللہ عنہ سے روایت کی کہ رسول اللہ ﷺ نے فرمایا :” میرے پاس براق لایا گیا ۔ وہ ایک سفید رنگ کا لمبا چوپایہ ہے ، گدھے سے بڑا اور خچر سے چھوٹا اپنا سم وہاں رکھتا ہے ، جہاں اس کی نظر کی آخری حد ہے فرمایا : میں اس پر سوار ہوا حتی کہ بیت المقدس آیا ۔ فرمایا میں نے اس کو اسی حلقے ( کنڈے ) سے باندھ دیا جس کے ساتھ انبیاء علیہم السلام اپنی سواریاں باندھتے تھے ۔ فرمایا : پھر میں مسجد میں داخل ہوا اور اس میں دو رکعتیں پڑھیں پھر ( وہاں سے ) نکلا تو جبریل علیہ السلام میرے پاس ایک برتن شراب کا اور ایک دودھ کا لے آئے ۔ میں نے دودھ کا انتخاب کیا تو جبریل علیہ السلام نے کہا : آپ نے فطرت کو اختیار کیا ہے ، پھر وہ ہمیں لے کر آسمان کی طرف بلند ہوئے جبریل علیہ السلام نے ( دروازہ ) کھولنے کو کہا تو پوچھا گیا : آپ کون ہیں ؟ کہا : جبریل ہوں ۔ پوچھا گیا : آپ کے ساتھ کون ہے ؟ کہا : محمد ﷺ ہیں ۔ کہا گیا : اور ( کیا ) انھیں بلوایا گیا تھا ؟ کہا : بلوایا گیا تھا ۔ اس پر ہمارے لیے ( دروازہ ) کھول دیا گیا تو میں اچانک آدم علیہ السلام کے سامنے تھا ، انھوں نے مجھے مرحبا کہا اور میرے لیے خیر کی دعا کی ، پھر وہ ہمیں اوپر دوسرے آسمان کی طرف لے گئے ، جبریل علیہ السلام نے دروازہ کھلوایا تو پوچھا گیا : آپ کون ہیں ؟ کہا : جبریل ہوں ۔ کہا گیا : آپ کے ساتھ کون ہیں ؟ کہا : محمد ﷺ ہیں ۔ کہا گیا : کیا انھیں بلوایا گیا تھا ؟ کہا : بلوایا گیا تھا ۔ تو ہمارے لیے دروازہ کھول دیا گیا ، اب میں دو خالہ زاد بھائیوں ، عیسیٰ ابن مریم اور یحیی بن ، زکریا کے سامنے تھا (اللہ ان دونوں پر رحمت اور سلامتی بھیجے ) دونوں نے مجھے مرحبا کہا اور دعائے خیر کی ، پھر جبریل علیہ السلام ہمیں اوپر تیسرے آسمان تک لے گئے ، جبریل نے دروازہ کھلوایا تو کہا گیا : آپ کون ہیں ؟ کہا جبریل ہوں کہا گیا : آپ کے ساتھ کون ہے ؟ کہا : محمد ﷺ ہیں ۔ کہا گیا : کیا ان کے پاس پیغام بھیجا گیا تھا ۔ کہا : ( ہاں ) بھیجا گیا تھا ۔ اس پر ہمارے لیے دروازہ کھول دیا گیا تو میں نے یوسف علیہ السلام کو دیکھا ، وہ ایسے تھے کہ ( انسانوں کا ) آدھا حسن انھیں عطا کیا گیا تھا ، انھوں نے مجھے خوش آمدید کہا اور دعائے خیر کی ، پھر ہمیں اوپر چوتھے آسمان کی طرف لے جایا گیا ، جبریل علیہ السلام نے دروازہ کھولنے کے لیے کہا تو کہا گیا : یہ کون ہیں ؟ کہا : جبریل ہوں ۔ کہا گیا : اور آپ کے ساتھ کون ہیں ؟ کہا محمد ﷺ ہیں ۔ کہا گیا : ان کے پاس پیغام بھیجا گیا تھا ؟ کہا : ہاں ، بھیجا گیا تھا ۔ تو ہمارے لیے دروازہ کھول دیا گیا ، تب میرے سامنے ادریس علیہ السلام تھے ۔ انھوں نے مجھے مرحبا کہا اور میرے لیے دعائے خیر کی ۔ اللہ تعالی کا فرمان ہے :’’ ہم نے اسے ( ادریس علیہ السلام کو ) بلند مقام تک رفعت عطا کی :‘‘ پھر ہمیں اوپر پانچویں آسمان پر لے جایا گیا تو جبریل نے دروازہ کھلوایا ، کہا گیا : یہ کون ہیں ؟ کہا : جبریل ہوں ۔ کہا گیا : اور آپ کے ساتھ کون ہیں ؟ کہا : محمد ﷺ ہیں ۔ پوچھا گیا : ان کے لیے پیغام بھیجا گیا تھا ؟ کہا : ہاں بھیجا گیا تھا ، چنانچہ ہمارے لیے دروازہ کھول دیا گیا ۔ تب میری ملاقات ہارون علیہ السلام سے ہوئی ، انھوں نے مجھے خوش آمدید کہا اور میرے لیے خیر کی دعا کی ، پھر ہمیں چھٹے آسمان پر لے جایا گیا ، جبریل علیہ السلام نے دروازہ کھلوایا تو کہا گیا : یہ کون ہیں ؟ کہا : جبریل ۔ کہا گیا : آپ کے ساتھ کون ہیں ؟ کہا : محمد ﷺ ہیں ۔ پوچھا گیا : کیا انھیں پیغام بھیجا گیا تھا ؟ کہا : ہاں ، بھیجا گیا تھا ۔ تو ہمارے لیے دروازہ کھول دیا گیا ۔ تب میری ملاقات موسیٰ علیہ السلام سے ہوئی ، انھوں نے مجھے خوش آمدید کہا اور دعائے خیر کی ، پھر ہمیں اوپر ساتویں آسمان پر لے جایا گیا، جبریل نے دروازہ کھلوایا ۔ کہا گیا : یہ کون ہیں ؟ کہا : جبریل ۔ کہا گیا : آپ کے ساتھ کون ہیں ؟ کہا : محمد ﷺ ہیں ۔ کہا گیا : کیا ان کی طرف پیغام بھیجا گیا تھا ؟ کہا : ( ہاں ) بھیجا گیا تھا ۔ اس پر ہمارے لیے دروازہ کھول دیا گیا تو میں حضرت ابراہیم علیہ السلام کے سامنے تھا ۔ انھوں نے بیت معمور سے ٹیک لگائی ہوئی تھی ۔ اس ( بیت معمور ) میں ہر روز ستر ہزار فرشتے ( عبادت کے لیے ) داخل ہوتے ہیں ، پھر کبھی دوبارہ اس میں واپس ( آ کر داخل ) نہیں ہو سکتے ، پھر جبریل مجھے سدرۃ المنتھیٰ ( آخری سرحد پر واقع بیری کے درخت ) کے پاس لے گئے ، اس کے پتے ہاتھیوں کے کانوں اور اس کے بیر مٹکوں کی طرح ہیں ، جب اللہ کے حکم سے جس چیز نے اسے ڈھانپنا تھا ڈھانپ لیا ، تو وہ بدل گئی ، اللہ تعالیٰ کی کوئی ایسی مخلوق نہیں جو اس کے حسن کا وصف بیان کر سکے ، پھر اللہ تعالیٰ نے میری طرف وحی کی جو کی ، اور مجھ پر ہر دن رات میں پچاس نمازیں فرض کیں ، میں اتر کر موسیٰ علیہ السلام کے پاس آیا تو انھوں نے کہا : آپ کے رب نے آپ کی امت پر کیا فرض کیا ہے ؟ میں نے کہا : پچاس نمازیں ۔ موسیٰ علیہ السلام نے کہا : اپنے رب کے پاس واپس جائیں اور اس سے تخفیف کی درخواست کریں کیونکہ آپ کی امت ( کے لوگوں ) کے پاس اس کی طاقت نہ ہو گی ، میں بنی اسرائیل کو آزما چکا ہوں ۔ آپ نے فرمایا : تو میں واپس اپنے رب کے پاس گیا اور عرض کی : اے میرے رب ! میری امت پر تخفیف فرما ۔ اللہ تعالیٰ نے مجھ سے پانچ نمازیں کم کر دیں ۔ میں واپس موسیٰ علیہ السلام کی طرف آیا اور کہا : اللہ تعالی نے مجھ سے پانچ نمازیں گھٹا دیں ۔ انھوں نے کہا : آپ کی امت کے پاس ( اتنی نمازیں پڑھنے کی ) طاقت نہ ہو گی ۔ اپنے رب کی طرف لوٹ جایئے اور اس سے تخفیف کا سوال کیجیے ۔ آپ نے فرمایا : تو میں اپنے رب تبارک و تعالیٰ اور موسیٰ علیہ السلام کے درمیان آتا جاتا رہا یہاں تک کہ اللہ تعالیٰ نے فرمایا : اے محمد ! ہر دن اور رات میں پانچ نمازیں ہیں اور ( اجر میں ) ہر نماز کے لیے دس ہیں ، ( اس طرح ) یہ پچاس نمازیں ہیں اور جو کوئی ایک نیکی کا ارادہ کرے گا لیکن عمل نہ کرے گا ، اس کے لیے ایک نیکی لکھ دی جائے گی اور اگر وہ ( اس ارادے پر ) عمل کرے گا تو اس کے لیے دس نیکیاں لکھی جائیں گی ۔ اور جو کوئی ایک برائی کا ارادہ کرے گا اور ( وہ برائی ) کرے گا نہیں تو کچھ نہیں لکھا جائے گا اور اگر اسے کر لے گا تو ایک برائی لکھی جائے گی ۔ آپ نے فرمایا : میں اترا اور موسیٰ علیہ السلام کے پاس پہنچا تو انھیں خبر دی ، انھوں نے کہا : اپنے رب کے پاس واپس جائیں اور اس سے ( مزید ) تخفیف کی درخواست کریں تو رسول اللہ ﷺ نے فرمایا :’’ میں نے کہا : میں اپنے رب کے پاس ( بار بار ) واپس گیا ہوں حتی کہ میں اس سے شرمندہ ہو گیا ہوں ۔‘‘

 سلیمان بن مغیرہ نے کہا : ہمیں ثابت نے حضرت انس بن مالک رضی اللہ عنہ سے حدیث بیان کی ، انہوں نے کہا کہ رسول اللہ ﷺ نے فرمایا :’’ میرے پاس ( فرشتے ) آئے اور مجھے زمزم کے پاس لے گئے ، میرا سینہ چاک کیا گیا ، پھر زمزم کے پانی سے دھویا گیا ، پھر مجھے ( واپس اپنی جگہ ) اتار دیا گیا ۔‘‘ ( یہ معراج سے فوراً پہلے کا واقعہ ہے ۔

 ( سلیمان بن مغیرہ کے بجائے ) حماد بن سلمہ نے ثابت کے واسطے سے حضرت انس بن مالک رضی اللہ عنہ سے حدیث سنائی کہ رسول اللہ ﷺ کے پاس جبریل علیہ السلام آئے جبکہ آپ بچوں کے ساتھ کھیل رہے تھے ، انہوں نے آپ کو پکڑا ، نیچے لٹایا ، آپ کا سینہ چاک کیا اور دل نکال لیا ، پھر اس سے ایک لوتھڑا نکالا اور کہا : یہ آپ ( کے دل میں ) سے شیطان کا حصہ تھا ، پھر اس ( دل ) کو سونے کے طشت میں زمزم کے پانی سے دھویا ، پھر اس کو جوڑا اور اس کی جگہ پر لوٹا دیا ، بچے دوڑتے ہوئے آپ کی والدہ ، یعنی آپ کی رضاعی ماں کے پاس آئے اور کہا : محمد ( ﷺ ) کو قتل کر دیا گیا ہے ۔ ( یہ سن کر لوگ دوڑے ) تو آپ کو سامنے سے آتے ہوئے پایا ، آپ کا رنگ بدلا ہوا تھا ، حضرت انس رضی اللہ عنہ نے کہا : میں اس سلائی کا نشان آپ کے سینے پر دیکھا کرتا تھا ۔ ( یہ بچپن کا شق صدر ہے ۔

 شریک بن عبداللہ بن ابی نمر نے حدیث سنائی ( کہا ) : میں نے حضرت انس بن مالک رضی اللہ عنہ سے سنا ، وہ ہمیں اس رات کے بارے میں حدیث سنا رہے تھے جس میں رسول اللہ ﷺ کو مسجد کعبہ سے رات کے سفر پر لے جایا گیا کہ آپ کی طرف وحی کیے جانے سے پہلے آپ کے پاس تین نفر ( فرشتے ) آئے ، اس وقت آپ مسجد حرام میں سوئے ہوئے تھے ۔ شریک نے ’’ واقعہ اسراء ‘‘ ثابت بنانی کی حدیث کی طرح سنایا اور اس میں کچھ چیزوں کو آگے پیچھے کر دیا اور ( کچھ میں ) کمی بیشی کی ۔ ( امام مسلم نے یہ تفصیل بتا کر پوری روایت نقل کرنے کی ضرورت محسوس نہیں کی ۔